alola

Press Release - Tetun

ALOLA - MSS REALIZA FORMASAUN "HAKBI'IT EKONOMIA FETO RURAL NO SENSIBILIZASAUN KONA-BA IMPAKTU VIOLÉNSIA DOMÉSTIKA NO VIOLÉNSIA BAZEIA BA JÉNERU

Alola - MSS Halo formasaun ba Feto VurneravelAlola - MSS Halo formasaun ba Feto Vurneravel2Alola - MSS Halo formasaun ba Feto Vurneravel3Alola - MSS Halo formasaun ba Feto Vurneravel4

(ALOLA media) Durante loron 4 (3-6 Outubru 2017), Fundasaun Alola nu'udar Instituisaun Solidariedade Sosial (ISS) serbisu parseria ho Ministériu Solidariedade Sosíal (MSS) parte Direcão Nasionál Dezenvolvimento Sosíal (DNDS) - nomos Administrasaun Munisipiu Liquica realiza formasaun ida ho titulu "Hakbi'it Ekonomia Feto Rural No Sensibilizasaun Kona-Ba Impakto Violénsia Doméstika No Violénsia Bazeia Ba Jéneru". Formasaun ne'e rasik ofisialmente loke husi Administrador Munisipiu Liquica, Dr.Domingos da Concenção, implementa ho objetivu hodi kapasita feto vurneravel sira oinsa bele hasa'e sira nia konsensi

a hodi prevene violensia domestika no violensia baseia ba jeneru inklui oinsa bele haforsa sira nia ekonomia nian liu husi atividade oi-oin.

"Formasaun ida ne'e hanesan parte ida hodi kontribui ba re-integrasaun feto vurneravel sira ba sira nia familia, oinsa atu haforsa sira ba parte ekonomia nian no oinsa sensibiliza ba grupu vurneravel sira atu bele prevene violensia baseia ba jeneru no violensia domestika", hatete Diretora Ezekutiva Fundasaun Alola, Alzira Reis durante sesaun abertura.

Entertantu, Director DNDS-MSS, Dr.Florencio Dias Gonzaga iha ninia deskursu ba abertura hatete katak programa ne'ebe ohin realiza hanesan meius ida hodi hatan mos ba problema reinserasaun sosial, asuntu importante iha ita nia sosiedade.

"Programa ne'e implementa relasiona ho ita nia mehi ida ba problema re-inserasaun sosial, oinsa atu ema hotu-hotu iha komunidade tantu feto ka mane rekopera diak iha nivel familia nian, moris diak la iha komplitu no tau matan ba sira nia oan", haktuir Director DNDS-MSS iha Salaun SAIM Liquica.

Tuir dadus perkiza husi Fundasaun Azia nian hatudu katak kuaze 86% maluk feto sira ho esperensia violensia la iha koragen atu hatoo sira nia keixa, husi porsentasaun hirak ne'e, numeru 32% fahe ninia esperiensia ba familia sira no kuaze 3% deit hato'o ba iha polisia, 2% hato'o ba autoridade lokal no menus husi 1% hato'o ninia kazu ba organizasaun fornesedor serbisu sira. Direitora Ezekutiva Alola afirma katak haforsa sensibilizasaun kona-ba violensia domestika no violensia baseia ba jeneru ninia impaktu hanesan dalan hodi fo koragem ba feto maluk sira atu brani liu-tan. Nia mos reforsa tan katak fator ekonomia sai hanesan pilar importante ba halakon violensia sira ne'e.

"Hau hanoin, nesesidade familia nian ijiji ita atu forsa iha ekonomia liu-liu oinsa ita feto rasik bele kontribui ba iha ne'eba. Formasaun ne'e sei hola parte atu hatan ba kestaun sira ne'ebe ohin hau mensiona, iha loron ikus husi formasaun ne'e, sira sei hetan apoia ne'ebe MSS fornese liu-husi Fundasaun Alola atu bele halo fila-liman iha uma laran iha parte negosiu kiik sira hanesan loke kios, agrikultura no ba iha kreditu", esplika Diretora Alzira Reis.

Seremonia abertura ne'ebe konsentra iha Salaun Secretariado de Apoio Instalação de Municipios (SAIM) nian hetan partisipasaun masimu laos deit husi feto ne'ebe sai alvu husi atividade ne'e maibe hetan mos partisipasaun husi Director DNDS, Direitora MSS Regional Liquica, Administrador do Posto Liquica, Maubara no Bazartete, reprezentante Asosiasaun Feto, membru Grupu Trabalhu Jeneru - Munisipiu nian, ekipa programa Hakbiit Ekonomia - Alola inklui mos media nasional. Apresiasaun diak hato'o husi Dr.Domingos da Concenção nu'udar Administrador Munisipiu Liquica durante abertura.

"Formasaun ida ohin importante no bele motiva feto sira atu iha idea inovativu no kreativu atu nune'e bele fo resultadu adekuadu ba moris loron-loron iha familia no sosiedade", Administrador Liquica ne'e haktuir bain.

Nia mos salienta katak Timor-Leste presiza duni feto no mane nia partisipasaun ativa hodi bele haforte proses dezenvolvimentu nasaun nian, no hein katak liu husi formasaun ne'e, feto sira ne'ebe partisipa bele fo resultadu diak ba reseitas familia nian liu husi atividade ekonomia oin-oin.

Diretora Alola, Alzira Reis mos hato'o ninia agredesementu ba kolaborasa ne'ebe iha durante tinan naruk nia laran entre Fundasaun Alola ho MSS parte DNDS nomos parseirus sira seluk hanesan administrador do posto, NGO local sira inklui feto maluk sira ne'ebe hamutuk 800 resin sai alvu husi Alola ba programa ida ne'e.

"Alola no MSS mesak la bele halo buat ida maibe ho kontribuisaun husi ema ida-idak ninian, ita bele harii familia ida sai forte, feto ida sei forte no nasaun forte tanba husi feto ida ne'ebe forte sei hamosu jerasaun ne'ebe forte hodi bele harii nasaun ida ne'e", hatete Alzira Reis antes taka ninia lia menon.

Iha tinan 2017, Ministériu Solidariedade Sosiál (MSS) prevé ona orsamentu ho montante hamutuk 1.4 milaun dolar ba Institusaun Solidariedade Sosial (ISS) hamutuk 28 inkui Fundasaun Alola atu bele haforsa tan serbisu ba prevensaun, prestasaun servisu sosiál, reintegrasaun vítima ba família no komunidade, promosaun no protesaun labarik hosi risku, asistensia vitima nomos ba apoio sosio ekonomiku ba sobrevivente sira.

Alola hamutuk ho ACBIT no Pradet hanesan ONG nain tolu ne'ebe hetan konfiansa husi MSS ba tinan fiskal 2017. Liu husi konfiansa ida ne'e, Alola sei haluan liu-tan programa Hakbiit Ekonomia hodi "Hakbi'it Ekonomia ba Feto Sobrevivente no Vulneravel iha área Rurál no Hasae Rekursu ba Feto" liu-liu ba Municipiu 5 hanesan Liquica, Manatuto, Baucau, Viqueque no Regional Espesial Oe-cusse.

"Projetu ida ne'e hanesan kontinuasaun husi projetu tinan 2016 nian atu fó kapasitasaun ba grupu feto vulnerável inklui kbi'it laek, alizadu no sobreviventeviolénsia bazeia ba jeneru iha Distritu 5 iha Timor Leste inklui Liquica, Manatuto, Baucau, Viqueque no Regional Espesial Oe-cusse. Benefisiáriu direita hamutuk ema nain 125 no indireita hamutuk ema nain 875 mak sei benefisiu final ba projetu ne'e", esplika Direitor Ezekutiva Fundasaun Alola Sra. Alzira Reis.

Projetu ne'e rasik sei kapasita grupu feto sobrevivente sira iha área ekonomia ka buka moris hodi sira bele hasae rendimentu familia nian liu husi fornese formasaun hanesan jestaun negósiu, fóti dezisaun, fahe infórmasaun kona-ba asuntu violénsia bazeia ba jéneru, direitus Umanus no tráfiku umanu grupu feto sira.

"Atividade hirak ne'e bele loke grupu feto vulnerável sira nia visaun hodi bele halo mudansa iha sira nia hahalok moris no hadia vida ekonomia hodi sustenta familia e liu-liu oan sira hodi asesu ba escola, hadia saude, komunidade moris ho hakmatek no saudavel. Liu husi kapasitasaun ida ne'e hanesan meus hodi prevene violénsia domestika no hamenus dependensia ekonomia no lori sira sai Xefe da familia hodi lidera familia iha sira nia moris", esplika Jerente ba Hakbi'it Ekonomia Feto - Alola, Jose Ximenes.

Durante tinan 8 resin (2010-2017), Alola sai parseiru husi MSS hodi haforsa atividade Mikro Kréditu ho Fundus Kiik ba grupu feto sobrevivente ne'ebé eziste iha Munisipiu 13. Grupu feto hamutuk 49 hetan benefisiu husi projetu ne'e no husi prosesu avaliasaun nota katak programa ida ne'e importante tebes ba komunidade, liu-liu sira vulnerável no kbiit la'ek sira hodi hasa'e sira nia rendimentu ekonomia.

#remata.


Atu hetan tan informasaun seluk, halo-favór kontakto:

Alola Mídia Koodenador :

Fransiskus XS,
Telfon : (+670) 78000002
Email : fransiskus.xs@alolafoundation.org
Website : www.alolafoundation.org
Facebook : fundasaun.alola
Twitter : alolafoundation
Instagram : alolafoundation

 

 

Share this!

AlolaFBicon