alola

Press Release - Tetun, ALOLA-DNAAS Asina Akordu

ALOLA MAE-DNAAS ASINA NOTA ENTEDEMENTU BA DATOLU HODI HAFORSA LIDERANSA KOMUNITÁRIA FETO IHA SUKU 24.

 

Komunikadu Imprensa

Asina Nota Entedementu MAE-ALOLA

Fundasaun Alola hanesan organizasaun naun governamental ne'ebé durante ne'e fo komitmentu maka'as atu promove Direitu Feto no Labarik iha Timor-Leste iha Kinta Feira horisehik (10/2) asina nota atendementu hodi renovasaun serbisu parseiria ho Diresaun Nasional Apoiu Administração Suku (DNAAS) Ministériu Administrasaun Estatál (MAE). Liu husi asina nota atendementu ne'e, parte rua ne'e fo sira nia komprimisiu hodi haforsa lideransa komunitária feto sira liu husi atividade formasaun Lideransa no akompañamentu "mentoring" iha area lideransa no advokasia.

Durante seremonia, Diretor-Geral ba Desentralizasaun Administrativa - MAE, Sr. Abílio José Caetano ne'ebe akompanha Diretúr Nasional DNAAS, Sr. Amandio Paulino Gastão do Rosario apresia tebes ho renovasaun akordu serbisu parseria ne'e. Iha ninia mensagem, direitor jeral ne'e esplika objetivu principal husi asina nota atendementu ida ne'e.

"Objetivu principal ba serbisu hamutuk ida ne'e maka Fundasaun Alola ho sira nia kbiit ne'ebe iha hili suku 24 iha teritorio laran tomak tuir daduz ne'ebe sira ho objetivu principal atu halo kapasitasaun ba feto maluk sira liu-liu ba membru konselhu suku feto, representante feto nomos delegadas husi aldeia sira", esplika Diretor-Geral ba Desentralizasaun Administrativa ne'e.

CEO Alola iha Seremonia asinatu MouEntertantu, Xefe Ezekutiva Fundasaun Alola, Sra. Alzira Reis iha ninia liameno antes asina Nota Entedementu ne'e esplika katak akordu ne'ebe asina bele fortifika servisu parseria ne'ebe durante ne'e iha hodi fo akompanhamentu ba lideransa komunitarian feto sira inklui mos konselhu suku iha suku hamutuk 24 ne'ebe sai hanesan suku alvu Alola nian.

"Hau hanoin esforsu naruk ne'ebe Ami halo desde tinan 2009 serbisu hamutuk ho DNAAS - Ministeriu Estatal hetan ona resultadu ne'ebe diak no ho asina akordu loron ohin nian bele hametin liu-tan ita nia relasaun serbisu hodi bele hamosu barak liu-tan ita nia feto forte sira iha suku laran", hatete Xefe Ezekutiva Fundasaun Alola.

Baseia ba Nota Entedementu ne'ebe asina ho periodu tinan 1 , Fundasaun Alola sei kobre atividade iha suku 24 ne'ebe durante sai suku alvu hodi akompañamentu "mentoring" ho estratejia forum konsultasaun reprezentante juventude feto hamutuk ho konsellú suku feto. Suku sira ne'e komportu husi suku Seloi Kraik, Lauisi, Manelobas, Horaikik, Betano, Babulu, Suai - Loro, Lalawa, Ililai, Com, Caraubalu, Bibileo, Seisal, Triloka, Aiteas, Sau, Dato, Vatuvou, Fatuquero, Mertutu, Lahomea, Tapo/Memo, Costa nomos Suku Nipani.

Fundasaun Alola iha komitmentu ne'ebe aas teb-tebes hodi tau komitementu ba fo kapasitasaun feto potensial sira iha nivel suku nian nomos representante feto iha estrutura suku nian desde 2009. Resultadu serbisu hamutuk durante tinan naruk ne'e atinji ona resultadu diak.

"Haree ba Eleisaun Suku foin dadaun ne'e hatudu katak porsentasaun feto sai xefe suku aumenta kompara ho tinan 5 ba kotuk ne'ebe hetan 2% deit no depois kapasitasaun husi organizasaun naun governmentais nomos husi ministeriu relevante sira fo bele aumenta porsentasaun ba iha 5%", haforsa Alzira Reis.

Diretora Alola ne'e mos informa katak husi xefe suku 20 resin ne'ebe eleitu iha Eleisaun Suku foin dadaun kuaze ema hamutuk 11 hanesan alvu husi Fundasaun Alola no numeru ida ne'e seidauk sura ho feto potensial alvu Alola nian ne'ebe eleitu sai xefe aldeia sira.

Asina Nota Entedementu MAE-ALOLA2Esforsu ne'ebe Fundasaun Alola hatudu liu husi serbisu parseria ho MAE sai hanesan kontribuisaun ida hodi ajuda programa Governo nian atu bele hasa'e kapasitasaun ita nia feto maluk sira liu-liu iha nivel suku. Diretor-Geral ba Desentralizasaun Administrativa - MAE, Sr. Abilio Jose Caetano informa mos katak Ministru Administrasaun Estatál (MAE), Valentim Ximenes fo apoio tomak ba serbisu hamutuk ida ne'e. Nia mos reforsa tan katak MAE mos loke odomatan ba serbisu parseria ho organizasaun seluk.

"Ba NGO sira seluk ne'ebe hakarak serbisu ho ami, odomatan nakloke, oinsa ita bele serbisu hamutuk hodi kapasita ita nia feto maluk sira liu-liu feto jovens sira iha nivel suku", hatete nia.

Fundasaun Alola hanesan organizasaun naun governamental ne'ebé iha dever atu promove Direitu Feto no Labarik hare'e katak presiza fo atensaun urjente iha prosesu asiste Lideransa Komunitaria ho diresolve problema feto ho labarik liu husi dalan formasaun no advokasia. Koperasaun serbisu ho DNAAS-MAE hanesan parte importante husi haforsa linha kordenasaun entre Fundasaun Alola ho Autoridade Lokal sira.

"Sei feto mesak, ita la bele halo serbisu ho diak maibe oinsa atu feto mane apoio malu, atu bele unidu, eqilibre hodi serbisu diak liu-tan iha suku tanba feto no mane hamutuk ita bele halo dezenvolvimentu diak liu tan iha suku hotu-hotu", dehan Diretora Alola ba jornalista sira iha Salaun Fundasaun Alola.

Depois asina ofisialmente Nota Entedementu, Diretora Fundasaun Alola Alzira Reis entrega simbolikamente livru manual terinamentu "Haforsa Kualidade no Kuantidade Feto iha Lideransa" ba Diretúr Nasional DNAAS, Sr. Amandio Paulino Gastão do Rosario.

#remata


Atu hetan tan informasaun seluk, halo-favór kontakto:

Alola Mídia Koodenador :

Fransiskus XS.
Telfon : (+670) 78000002
Email : fransiskus.xs@alolafoundation.org
Website : www.alolafoundation.org
Facebook : fundasaun.alola
Twitter : alolafoundation
Instagram : alolafoundation

 

 

 

Share this!

AlolaFBicon