Fundasaun Alola hanesan Organizasaun Naun-govermentál (ONG) no non-lukrutivu, ne’ebé mak opera iha Timor Leste, atu hasa’e kualidade moris feto no labarik. Fundasaun Alola hasa’e kapasidade lideransa feto no halo advokasia ba direitu feto no labarik ho ninia moto: “Feto Forte Nasaun Forte” no Fundasaun Alola nia programa sira mak hanesan Programa Saúde Inan no Oan, Programa Hakbiit Ekonomia, Programa Edukasaun no Programa Advokasia. Fundasaun Alola lidera husi Manajementu konsellu, no mós ho movimentu ne’ebé mak iha, ohin loron ekipa manajementu tomak lidera husi Timorense.

Agora dadaun Fundasaun Alola buka hela ema Timor oan ne’ebé mak kualifikadu atu bele prienxe pozisaun tuir mai:

OFISIÁL TERENU (OT), PROGRAMA SAÚDE INAN NO OAN, FUNDASAUN ALOLA, ne’ebé mak sei lokaliza iha Munisípiu Ainaro no Ermera.

Ofisiál Projetu Nutrisaun Integradu, BESI, SSR, no Agrikultura Sustentável mak sei responsavel ba implementasaun no koordenasaun atividade bazeia ba komunidade ne’ebé promove saúde inan no labarik, nutrisaun, ijiene, saneamentu, no prátika agrikultura sustentável. Pozisaun ida-ne’e iha papél sentrál hodi hakbiit komunidade sira—liuliu feto no família sira—atu hadi’a sira nia saúde, nutrisaun, no meius subsisténsia liu husi abordajen integradu no sustentável sira, hodi promove Estatutu Saude Inan no Oan iha Timor Leste.

XAVE KOMPETENSIA SIRA:

Atividade sira Integradu Nutrisaun, BESI, no SHR

• Asiste iha estabelesimentu no apoiu kontínuu ba grupu to’os nian, Grupu sira Suporta Inan, no membru sira GSI nian, hodi asegura partisipasaun ativu no sustentabilidade.
• Kolabora ho Ministériu Saúde (MS) no Grupu Traballu Nutrisaun hodi dezenvolve no harmoniza materiál no polítika sira promosaun saúde nian.
• Servisu iha parseria ho ajénsia sira seluk atu promove Saúde Inan no Oan iha nivel distritu no komunidade.
• Suporta dezenvolvimentu materiál promosaun saúde ne’ebé apropriadu kulturalmente ba formasaun no edukasaun komunitária.
• Fasilita sesaun formasaun kona-ba promosaun saúde inan no Oan, inklui IYCF, Planeamentu Familiar, Maternidade Seguru, no Saúde Seksuál no Reprodutiva (SRH).
• Koordena ho Advokasia, Edukasaun, no programa Dezenvolvimentu Ekonómiku atu promove saúde inan no oan iha inisiativa hotu-hotu Fundasaun Alola nian.
• Organiza no fasilita selebrasaun Semana Mundiál Fó Susubeen Inan nian iha nivel municipiu, postu administrativu no suco.
• Suporta atividade SISCa (Servisu Integradu Saúde Komunitária) no inisiativa promosaun saúde sira seluk iha fasilidade saúde sira.
• Monitoriza no apoia sesaun akonsellamentu ne’ebé hala’o husi membru GSI iha CHC no postu saúde sira.
• Entrega no monitoriza distribuisaun pakote maternidade iha fasilidade saúde.
• Halibur no mantein dadus kona-ba programa GSI, distribuisaun Pakote Maternidade, no atividade promosaun saúde.
• Hatama dadus ne’ebé loos iha sistema MEL (Monitorizasaun, Avaliasaun, no Aprendizajen).
• Prepara no submete relatóriu mensál no planu atividade mensal.
• Dokumenta no fahe istória susesu sira, atualizasaun progresu atividade, no eventu komunitáriu sira ba boletin informativu sira, relatóriu sira, no website sira.
• Atende enkontru mensál iha ekipa Saude Inan no Oan (SIO) nian no fornese atualizasaun progresu no planu regulár.
• Suporta ekipa sira hodi hala’o treinamentu, workshop, no preparasaun viajen ba projetu iha baze

Atividade sira BESI (Bee, Saneamentu, no Ijiene)

• Jere no superviziona atividade BESI hotu-hotu iha nivel kampu, hodi asegura planeamentu, implementasaun, no monitorizasaun aliña ho padraun kualidade nian.
• Halo koordenasaun ho MS no ME hodi promove saneamentu, sensibilizasaun saúde ambientál, no edukasaun ijiene.
• Asegura katak projetu BESI no infraestrutura hotu-hotu kumpre rekizitu doadór nian.
• Fó formasaun no asisténsia téknika ba uma-kain sira ba konstrusaun no reabilitasaun sintina, estasaun fase-liman, no bee-matan (tippy taps, tanki bee, rezervatóriu).
• Promove mudansa hahalok ijiene iha nivel uma-kain no komunidade.
• Halo koordenasaun ho parte interesada sira (MS, ME, estensionista MAF, ONG lokál, autoridade lokál, no komunidade sira) hodi garante implementasaun loloos no monitorizasaun ho kualidade.

Tékniku Agrikultura Sustentável no Modelu Agrikultura Uma-kain nian

• Organiza no hala’o sesaun treinamentu no workshop ba grupu to’os na’in sira kona-ba tékniku agrikultura foun no sustentável.
• Halo koordenasaun ho estensionista MAF sira hodi fó formasaun kona-ba modelu agrikultura uma-kain nian ne’ebé integra tópiku seguransa ai-han no nutrisaun (nutrisaun báziku, diversidade ai-han, frekuénsia refeisaun, dieta balansu, seguransa ai-han, no preparasaun/armazenamentu ai-han).
• Halo vizita regulár iha kampu hodi avalia kondisaun ai-horis, kualidade rai, no prátika jestaun to’os.
• Haburas relasaun ne’ebé metin ho agrikultór no membru komunidade sira hodi komprende dezafiu lokál sira no fó apoiu ne’ebé apropriadu.
• Asegura dokumentasaun sistemátiku kona-ba prátika di’ak liu, lisaun sira ne’ebé aprende ona, no esperiénsia sira iha kampu ne’ebé integra BESI, nutrisaun, no agrikultura.
• Hala’o servisu seluk ne’ebe mak haruk/delega husi supervizór ka Jestaun programa nian hodi atinji objetivu sira projetu nian.

KUALIFIKASAUN NO ABILIDADE:

• Lisensiatura Universidade iha area Saude Publiku, Nutrisaun, Saúde Ambientál, Agrikultura, Dezenvolvimentu Komunitáriu, ka área ruma ne’ebé mak relevante, Diploma ikus ne’ebe mak legaliza husi Ministeriu da Edukasaun.
• Esperensia minimu tinan 1 ka 2 iha area mobilizasaun komunidade, promosaun saúde, no fasilitasaun formasaun.
• Abilidade komunikasaun no fasilitasaun ne’ebé di’ak tebes.
• Koñesimentu di’ak kona-ba métodu formasaun partisipativu no envolvimentu komunidade.
• Abilidade kolesaun dadus, relatóriu, no analítiku ne’ebé maka’as.
• Literasia komputador (MS Word, Excel, ferramenta hatama dadus).
• Abilidade servisu iha ekipa, organizasaun, no rezolusaun problema ne’ebé di’ak tebes.
• Prontu servisu mesak.
• Hatene lori motor no iha karta kondusaun ne’ebe sei validu.
• Prioridade liu ba pesoal husi Munisipiu Ainaro no Ermera, ne’ebé mak hatene lian inan ka lian matérna, Munisipiu rua refere.

OINSÁ ATU APLIKA:

Favor submete ita bo’ot nia aplikasaun no CV inklui dokumentus relevantes mai iha Edifisiu Sentral Fundasaun Alola, Avenida Bispo Medeiros,  Mascarenhas (Edifisiu Polisia Militar nia oin), Dili, Timor Leste.

Rekerimentu sei diriji ba Kordenadora Rekursu Humanu, Fundasaun Alola, molok loron 21 Novembru 2025 no sei la atende  aplikasaun Online. (Enkorája feto no ema ho defisiensia atu aplika).

Anota: Sei kontaktu diretamente ba de’it kandidata sira ne’ebé mak liu selesaun dokumentus hodi ba intervista.

Atu hetan kopia deskrisaun servisu, favór manda email ba Koordenadora Rekursu Humanu :

vaga@alolafoundation.org

Aplikasaun sei taka iha oras: 5 loraik, 21 Novembru 2025.

Feto Forte Nasaun Forte | Strong Women Strong Nation | Mulheres Forte Nação Fórte