SERBI HO DOMIN NO DEDIKASAUN: FUNDASAUN ALOLA HALA’O DESPEDIDA BA STAF SIRA NE’EBÉ REMATA KONTRATU

(Alola Media/Dili) — Ambiente nakonu ho domin no sentimentu nu’udar família boot ida mak nakonu iha eskritoriu Fundasaun Alola, CBD 10, Dili, horiseik lokoraik (31/3). Fundasaun hala’o serimónia despedida ida ne’ebé simples maibé signifikativu tebes ba staf sira ne’ebé remata ona sira-nia kontratu serbisu nian.

Eventu ne’e parte ida husi prosesu restruturasaun organizasaun Alola nian ne’ebé agora tama daudaun ba faze evolusaun foun ida iha ambitu selebrasaun aniversáriu fundasaun nian ba dala 25. Serimónia ne’ebé la’o ho dignidade ne’e lidera fali husi Diretura Ezekutiva Fundasaun Alola, Sra. Maria Guterres, no hetan partisipasaun husi jestor programa no staf sira hotu. Iha ninia intervensaun, Diretora Maria Guterres esplika katak restruturasaun ne’e hala’o hodi ajusta estrutura organizasaun ho nesesidade estratéjika ba futuru.

Apresiasaun Espesiál ba Ekipa Edukasaun

Jerente Alola ba Programa Edukasaun nian, Sra. Nuni Nobre, iha oportunidade ne’e hato’o ninia apresiasaun kle’an liuliu ba ekipa Pre-eskolár ne’ebé hatudu ona sira-nia lealidade nu’udar garda foun ba servisu edukasaun sedu iha Timor-Leste. Iha ninia diskursu, nia foti aas knaar staf sira-nian ne’ebé sai hanesan xave hodi harii fundasaun edukasaun ba labarik sira.

“Orgullu tebes bele koñese ita-boot sira, liuliu iha ekipa Pre-eskolár. Maske iha terrenu kolega sira hasoru dezafiu oioin, maibé kolega sira nafatin forte, mantein, to’o agora kolega sira hamutuk husi projetu Pre-eskolár harii to’o agora ita-boot sira nafatin to’o projetu ne’e remata,” dehan Sra. Nuni Nobre.

Nia mós hateten katak kompeténsia ne’ebé staf sira hetan durante hamutuk ho Alola sei sai hanesan kbiit boot ida hodi kompete iha merkadu serbisu nian.

“Obrigada barak tanba durante ne’e ita bele esforsu no halo servisu ho di’ak hodi nafatin gania konfiansa husi doadór hanesan UNICEF,” Mana Nuni tenik ho orgullu.

Mensajen husi Reprezentante Staf

Momentu ne’ebé triste tebes mak bainhira Sra Margarida Sarmento, ne’ebé koñesidu ho naran Mana Gida, hato’o ninia lia-menon reprezenta staf sira ne’ebé remata sira nia knaar. Serbisu durante tinan 16, Mana Gida antes ne’e serbisu  nu’udar koordenadora lojistiku sublinha katak Alola la’ós de’it fatin serbisu nian, maibé fatin hodi aprende valór umanidade nian ne’ebé kle’an.

“Iha Fundasaun Alola durante tinan 16, ha’u aprende buat barak tebes. Ha’u aprende kona-ba laran-di’ak, konxiénsia, no kompaixaun. Ha’u aprende atu hakuak ema seluk no hau sente katak iha Fundasaun Alola, domin no amizade maka’as tebes ba ita hotu,” nia hatete ho emosaun.

Nia mós husu ba kolega sira ne’ebé sei kontinua servisu atu hametin nafatin sinerjia no apoiu malu.

“Husu ba kolega sira hotu, atu nune’e nafatin to’o imi sei serbisu karik, tenke fó apoiu ba malu, serbisu di’ak, nafatin tane malu, hadomi malu nafatin hodi serbí komunidade,” Mana Gida akresenta, molok konklui ninia mensajen ho deskulpa sinseru ba família fundasaun tomak.

Esperansa Foun ba Futuru

Nu’udar forma rekoñesimentu nian, serimónia ne’e remata ho entrega sertifikadu apresiasaun nian. Momentu ne’e sai hanesan símbolu respeitu no rekoñesimentu ofisiál husi Alola ba dedikasaun staf sira-nian ne’ebé sai parte ona husi istória Alola. Maria Guterres antes tala nia diskursu afirma katak kontratu ne’ebé remata ne’e tanba projetu remata no restruturasaun, la’ós tanba komete kazu ruma.

“Remata ho servisu ida ne’e, la’ós signifika tanba ita-boot sira komete kazu ruma mak sai hosi ne’e, maibé tanba projetu balun remata, balun tanba restrutura. Odamatan Alola nian nafatin nakloke ba ita-boot sira… se iha vaga ita-boot sira bele kompete fali ba vaga sira-ne’e,” afirma Diretura Alola.

Nia mós hein katak staf sira bele hetan susesu ne’ebé boot liután iha instituisaun seluk.

“Ha’u fiar katak Maromak sei akompaña nafatin imi, sei fó bensan nafatin ba imi atu bele susesu di’ak liután… esperansa foun ne’ebé mak sei lori sorte i nakonu ho esperansa ba futuru,” Sra. Maria Guterres taka ninia liafuan.

Haree ba Futuru ho Orgullu

Despedida ne’e la’ós rohan husi buat hotu, maibé hanesan pasu foun ida ba opurtunidade ne’ebé luan liután. Dedikasaun ne’ebé staf sira hatudu ona hamutuk iha Fundasaun Alola hatudu katak serbisu ho laran-moos nunka saugati deit; ne’e sai hanesan fundasaun solidu ba progresu feto no labarik sira nian iha Timor-Leste. Pasu ida-idak ne’ebé agora sai husi CBD 10 lori espiritu “Alola”—espiritu domin, profesionalizmu, no laran-metin. Ita hotu fiar katak mudansa estrutura ne’e dalan ida hodi organizasaun bele moris, maibé di’ak ne’ebé staf sira husik hela sei hela ba nafatin hodi fó inspirasaun ba jerasaun foun sira atu kontinua serbisu ba umanidade.