Fundasaun Alola hanesan Organizasaun Non Govermental no Nonprofit ida ne’ebe hala’o nia programa iha Timor Leste hodi hasa’e kualidade moris feto no labarik, hasa’e kapasidade lideransa feto no luta ba direitu feto no labarik ho lema: “Feto Forte, Nasaun Forte”. Iha ninia operasaun, Fundasaun Alola implementa programa ne’ebé kompostu husi programa Saúde Inan no Oan, programa Empoderamentu Ekonómiku, programa Edukasaun no programa Advokasia. Fundasaun Alola nu’udar instituisaun ne’ebé lidera husi Konsellu Jestaun ida, no oras ne’e daudaun ekipa jestaun tomak lidera husi Timoroan.

Daudaun ne’e Fundasaun Alola loke hela oportunidade ba Timoroan sira ne’ebé kualifikadu hodi prienxe pozisaun sira tuir mai ne’e:

OFISIÁL TERENU (OT)- PROGRAMA ADVOKASIA BA MUNISIPIU LAUTEM NO RAEOA (Ema Nain 2)

Pozisaun ida ne’e sei servisu hamutuk ho Kordenadora Projetu Suporta Munisipiu (PSM) no Ofisial Projetu iha nivel munisípiu no sei suporta grupu feto sira.

Ofisiál Terenu (OT) sei hala’o ninia knaar bazeia ba intervensaun husi programa advokasia liu husi Kordenadora no Ofisial Projetu Suporta Munisipiu no sei servisu hamutuk ho grupu feto sira iha nivel suku hodi identifika problema ka kestaun prioridade sira ne’ebé mak feto sira hasoru iha baze, hafoin hala’o mós advokasia ba problema hirak ne’e ba instituisaun relevante inklui, rede referral Violensia Bazeia ba Jeneru (VBJ) iha nivel munisípiu.

XAVE KOMPETENSIA SIRA:

1. Suporta Projetu Suporta Munisipiu hodi estabelese fatin servisu ida hamutuk ho Organizasaun Sosiedade Sivil (OSS) lokál sira iha munisípiu no RAEOA;

2. Identifika suku iha ida-idak nia munisípiu inklui RAEOA;

3. Konvoka Forum Sidadania iha suku ne’ebé identifika ona;

4. Halo advokasia ba instituisaun relevante relasiona ho rezultadu Forum Sidadania iha kada suku;

5. Husu tuir/ follow up asaun advokasia ba instituisaun relevante ne’ebé Ofisial Terenu hala’o ona;

6. Halo kolaborasaun ho Asosiasaun Feto, Partidu polítiku sira no feto potensiál iha nivel munisípiu inklui RAEOA;

7. Identifika feto potensiál iha nivel munisípiu inklui RAEOA no halo asesmentu hodi identifika sira nia nesesidade;

8. Halo akompañamentu ba feto potensiál sira antes, durante no hafoin eleisaun;

9. Organiza no koordena atividades iha nivel munisípiu inklui RAEOA liga ho programa fokus Fundasaun Alola (Advokasia, Edukasaun Saude, Ekonomia) no presiza komunika ho programa sira durante halo koordenasaun servisu;

10. Regularmente partisipa enkontru rede referal iha nivel munisípiu inklui RAEOA;

11. Partisipa enkontru, bainhira hetan konvite husi parseiru relevante sira;

12. Halo kolaborasaun servisu ho instituisaun relevante iha nivel munisípiu relasiona ho asuntu edukasaun, saúde, ekonomia no advokasia inklui setores sira seluk iha nivel munisípiu inklui RAEOA;

13. Halo akompañamentu ba grupu alvu/tarjetu sira husi programa edukasaun, saúde no ekonomia, bainhira presiza no presiza kolabora ho ekipa programa fokus hirak ne’ebé iha nivel nasionál (Grupu Suporta Inan, Grupu Soru Tais no feto potensiál sira, grupu juventude ne’ebé mak programa advokasia estabelese ona no seluk tan);

14. Halo kolaborasaun ho média lokál (rádiu komunidade no média sira seluk);

15. Identifika nesesidade grupu feto, grupu suporta inan no juventude sira no fornese formasaun bazeia ba nesesidade. Presiza kolabora mós ho ekipa iha nivel nasionál;

16. Atende vítima violénsia bazeia ba jéneru iha nivel munisípiu inklui RAEOA;

17. Reprezenta Fundasaun Alola iha reuniaun advokasia, forum konferénsia, no rede advokasia ho parte interesada sira iha nivel munisípiu inklui RAEOA;

18. Prepara no submete relatóriu kada fulan ba Koordernadora Projetu Suporta Munisipiu, Programa Advokasia, Fundasaun Alola;

19. Atende atividade seluk bazeia ba orientasaun husi Koordenadora Projetu Suporta Munisipiu no programa seluk husi Fundasaun Alola.

KUALIFIKASAUN NO ABILIDADE:

• Remata husi Eskola Sekundaria;
• Esperiénsia servisu mínimu tinan 1- 2 iha área advokasia;
• Prontu servisu mesak;
• Iha abilidade atu mobiliza no organiza atividade iha baze;
• Iha abilidade komunikasaun ne’ebé di’ak ho autoridade lokál husi nivel munisipál to’o nivel suku no aldeia;
• Prioridade liu ba pesoál husi Munisipiu Lautem no Rejiaun Adminitrativu Espesial Oe-Cusse Ambeno (RAEOA).
• Enkoraja maka’as ba feto maluk sira atu bele aplika.

OINSA ATU APLIKA:

Favór submete ita boot nia aplikasaun no CV inklui dokumentus relevantes mai iha Edifisiu Sentral Fundasaun Alola, Avenida Bispo Medeiros – Mascarenhas (Edifisiu Polisa Militar nia oin), Dili, Timor Leste.

Rekerimentu sei dirije ba Kordenadora Rekursu Humanu, Fundasaun Alola, molok loron 04 Jullu 2025. 

Adota: Sei kontaktu diretamente ba de’it kandidata sira ne’ebé mak liu selesaun dokumentus hodi ba intervista.

Atu hetan kopia deskrisaun servisu, favór manda email ba:

(Koordenadora Rekursu Humanu) vaga@alolafoundation.org

Aplikasaun ida ne’e sei taka iha oras 5 loraik, 04 Jullu 2025.

#FetoforteNasaunForte  –  #StrongWomenStrongNation – #MulheresForteNaçãoFórte