IMG_1340

Photo : Diretora Interina Fundasaun Alola, Maria Imaculada Guterres entrega ofisialmente sertifikadu ba koordenadora Grupu SHIO husi Suku Leorema, Lorenza Goncalves durante seremonia graduasaun iha Sede Suku Leorema, Tersa-feira (24/5)

(Alolamedia/Liquica) Durante loron 2 (23-24/9) ekipa Fundasaun Alola hakat ba suku Asumanu no Leorema hodi fo graduasaun ba grupu Suku Hadomi Inan no Oan (SHIO) iha suku refere. Seremonia ne’e rasik marka fase importante ida, laos deit ba Fundasaun Alola maibe ba membru grupu SHIO sira hotu. Durante seremonia, membru sira hato’o sira nia komprimisiu iha autoridade lokal no komunidade nia oin katak sira pronto ona atu organiza mesak atividades saude inan no oan iha sira nia suku.

“Iha autoridade lokal nia oin, ami membru grupu Suku Hadomi Inan no Oan husi Suku Leorema ho laran tomak deklara katak hahu husi loron ohin ami hanesan grupu SHIO independente ona husi suku Leorema no hamutuk ho komunidade suku Leorema esforsu atu hasae direitu no dignidade inan no labarik sira iha suku ida ne’e”, deklara membru grupu SHIO husi suku Leorema, horisehik (24/9) iha sede suku Leorema.

Rekezitus barak grupu SHIO sira tenke prense antes hetan graduasaun maka hanesan tenke hatudu resultadu pozitivu liga ba atividade promove inisiativa maternidade seguru, promove fó-susubeen inan eskluzivu, nomos promove praktika uza ai-han lokal ne’ebe nakonu ho nutrisaun hodi fo han ba bebe sira fulan 6 ba leten.  Diretora Interina Fundasaun Alola, Maria Imaculada Guterres ne’ebe partisipa iha seremonia ne’e orgulhu tebes ho rezultadu positivu husi grupu SHIO. Durante nia diskursu, diretora ne’e husu atu membru SHIO sira nafatin sai ezemplár ba komunidade.

“Ita boot sira tama kriteria ba graduasaun, ida ne’e signifika katak ita boot sira prontu ona hamriik mesak sai promotor saúde inan no oan iha komunidade nia leet , nafatin sai ezemplár ba sira, nafatin eduka komunidade sira, importante tulun nafatin inan no labarik ne’ebe presiza tebes ita nia apoio”, hateten Maria Guterres,

Diretora Interina ne’e mos deklara katak Fundasaun Alola  sei nafatin hamutuk ho grupu SHIO sira durante fulan 6 dahuluk depois gradua hodi haree eksistensia SHIO ne’e iha komunidade.

“Ami sei akompanha sira durante tinan balun nia laran atu nune’e ita boot sira bele hamriik metin, bele iha kbiit ona atu halao ita boot nia papel hanesan grupu voluntario saúde komunidade nia iha komunidade nia leet atu ajuda sai liman ain tutan ba pessoal saúde sira”, esplika Maria Guterres.

Hahu husi tinan 2007 to’o agora, Fundasaun Alola liu husi tulun kompanha ConocoPhillips nomos ChildFund Timor-Leste hatudu ona ninia komitmentu hodi apoio programa saude inan no oan iha Munisipiu Liquica. Agora, programa SHIO estabelese ona iha suku hamutuk 22, husi numeru ida ne’e suku 14 hetan suporta husi kompanha ConocoPhillips no suku 8 suporta husi ChildFund Timor-Leste. Prezensa Fundasaun Alola liu husi grupu SHIO iha suku Asumanu no Leorema hahu husi tinan 2015 no durante tinan 4 implementasaun mudansa signifikativu komunidade sira hetan.

“Ita-boot rasik tenke orgulhu ba bainhira haree ba rezultadu implementasaun SHIO durante tinan 4 nia laran, labarik sira matenek no saudavel, ida ne’e maka rezultadu husi ita nia edukasaun, ita nia atensaun fo ba sira”, informa Diretora Interina Alola nian.

Nu’udar rede serbisu voluntario atu suporta saúde inan no oan iha komunidade, prezensa grupu SHIO sai fator determinante ida hodi promove inisiativa maternidade seguru, promove fó-susubeen inan eskluzivu, promove kuidadu ba bebe foin moris, fornese akonselamentu ba inan isin rua no inan fó susu bebé sira, inklui mos identifika no refere labarik ne’ebé mak sofre mal-nutrisaun iha suku laran.

“Ita tenke serbisu maka’as maski ita voluntario ita tenke serbisu ita tenke badinas, ita tenke iha vontade katak ita nia serbisu sei lori diak ba ita nia suku ida ne’e, ida ne’e maka importante”, hateten Sandra de Araujo, Xefe Suku Leorema durante seremonia.

Nu’udar lideransa lokal ne’ebe sei tau matan ba atividade grupu SHIO depois gradua, nia enkoraja nafatin atu membru SHIO sira hamutuk no unidade hodi nune’e iha tinan ida nia laran depois gradua bele hatudu hatudu rezultadu diak.

Entertantu, iha fatin hanesan, reprezentante Postu Saude Ekapu – Bazartete, Osorio Boseo ne’ebe asisti graduasaun ne’e fiar katak liu husi serbisu hamutuk, ba oin membru grupu SHIO sei lori susesu ba suku Leorema

“Ita hamutuk atu dezenvolve suku Leorema liu husi ita nia kontribuisaun atu motiva inan isin rua sira partus iha fasilidade saúde. Hau fiar katak mana sira nia presenza bele lori susesu ba suku Leorema”, informa reprezentante Postu Saude Ekapu iha Sede Suku Leorema.

Liu husi serbisu maka’as no dedikasaun forte, eksistensia grupu SHIO sira sei hatudu rezultadu ne’ebe diak katak  Labarik hanesan futuru jerasaun Timor-Leste nian sei hetan isin diak no saudavel ikus bele sai lider diak aban bainrua.

“Tanba husi inan sira ne’ebe saudavel sei moris bebe saudavel, bebe ida ne’ebe aban bainhrua sei matenek ba ita nia futuru nasaun nian”, lia-menon ikus husi Diretora Interina Alola nia.

Durante seremonia graduasaun, Fundasaun Alola liu husi ninia diretora interina entrega ofisialmente apoio fundus kiik inklui material sira seluk hanesan cofre atu rai osan no livru ba grupu SHIO ho objetivu atu utiliza ba atividade mikrokriditu. Antes ne’e, durante semana ida nia laran membru grupu SHIO sira hetan ona kapasitasaun kona-ba mikrokriditu no finanseiru baziku ne’ebe fornese husi ekipa programa Hakbiit Ekonomia Feto – Alola nian.

“Espera ita boot sira bele utiliza matenek sira ne’e atu bele haforsa ita nia grupu eksistensia no fundus ne’ebe hetan bele uza ho diak atu bele kontinua halo nafatin atividade ne’ebe durante ne’e halo liu-liu kona-ba edukasaun no akonsellamentu”, lia-menon badak Diretora Interina Alola nian antes entrega ofisialmente fundus ba koordenadora grupu.

#Alolamedia #mediaalola #FundasaunAlola #Alolafoundation #SHIO #MCH #Saude #Saudenannooan #Bazartete #Liquica #ConocoPhillips #salvinan #Timorleste #alolaprogram

 

“Iha autoridade lokal nia oin, ami membru grupu Suku Hadomi Inan no Oan husi Suku Leorema ho laran tomak deklara katak hahu husi loron ohin ami hanesan grupu SHIO independente ona husi suku Leorema no hamutuk ho komunidade suku Leorema esforsu atu hasae direitu no dignidade inan no labarik sira iha suku ida ne’e”, deklara membru grupu SHIO husi suku Leorema, horisehik (24/9) iha sede suku Leorema.
Grupu SHIO Leorema
Membru
%d