Hahu husi loron 26-28 fulan Jullu, ekipa Fundasaun Alola liu husi programa Advokasia partisipa iha formasaun kona-ba “Ligasaun Ho Respeitu ba Inan Aman” fasilita husi Debbie Katzman nu’udar konsultór international ne’ebé rekruta husi UN Women. Formasaun ne’ebé realiza virtual ne’e hanesan parte integradu husi projetu Inisiativa Spotlight iha Timor-Leste ne’ebé hetan apoio husi União Europeia (UE), ONU no UN Women.

Projetu Inisiativa Spotlight ne’ebé Alola implementa sei fó kbi’it ba joven, inan-aman, manorin no membru komunidade sira ho abilidade atu promove relasaun saudavel, justu no mos komunikasaun sein violénsia bele prevene violénsia atu komesa uluk. Eskola pre-sekundaria hamutuk 15 iha munisípiu 3 mak hanesan Bobonaro, Ermera no Viqueque sei sai tarjeitu ba projetu ne’e. Maria Evelina nu’udar Gestor Alola ba programa Advokasia esplika katak husi kada eskola, estudante hamutuk 30, manorin 4 no komunidade hamutuk 30 sei hetan benifisiariu husi projetu ne’e.

“Kada eskola ho tarjetu estudante hamutuk 30 maibe nafatin asegura katak iha balansiu entre labarik feto no labarik mane”, esplika Maria Evelina iha edifísiu Alola.

Durante implementasaun projetu iha komponente tolu importante. Komponente ida maka sei fo formasaun ba manorin sira husi eskola ne’ebe Ministeriu Edukasaun identifika ona iha munisípiu Ermera,  Maliana no Viqueque. Komponente ida tan maka estudante sira nomos komponente ikus mak inan aman sira ne’ebé sira nia oan eskola iha eskola tarjetu. Formasaun kona-ba “Ligasaun Ho Respeitu ba Inan Aman” hanesan komponente ida husi komponente tolu ne’e. Jerente Alola esplika razaun saida hili komponente tolu ne’e.

“Tanba ita haree katak fatór kontribui ba hamosu violénsia doméstika ne’e laos deit husi familia, laos husi sosiedade maibe husi eskola mós”, esplika Maria Evelina,  jerente Alola ba programa Advokasia. 

Eskola sai fatin xave ida hodi bele atinji objetivu projetu ne’ebe iha, livre husi violénsia hasoru feto no labarik feto sira. Bainhira situasaun eskola nian bele hakiak relasaun diak entre estudante no profesor ou entre manorin sira ho inan aman no sosiedade maka eskola bele sai fatin amigavel ba labarik sira. Tanba ne’e presiza kontribuisaun husi komponente hotu liu-liu oinsá labarik estudante sira bele iha etika komunikasaun diak, relasaun diak entre labarik feto no labarik mane, nomos relasaun diak ho manorin sira, depois relasaun diak husi profesor no inan aman.

Antes ne’e iha fulan hirak liu-ba, Inisiativa Spotlight, UN Women no Fundasaun Alola asina akordu parseria, hamutuk ho Mane Ho Vizaun Foun  (MHVF) hodi alkansa futuru livre husi violénsia hasoru feto no labarik feto sira. Tuir akordu ne’e, Fundasaun Alola hamutuk ho Mane Ho Vizaun Foun  (MHVF) sei lori programa  to’o iha eskola pre-sekundaria hamutuk 15 inklui komunidade sira iha munisípiu 3 mak hanesan Bobonaro, Ermera no Viqueque.

Iha biban hanesan, Maria Evelina informa katak realizasaun husi projetu ne’e sei fo apoio serbisu Sekretaria Estadu ba Igualdade no Inkluzaun (SEII) iha prosesu implementasaun Plano Asaun Nasionál Violénsia Baseia ba Jeneru liu-liu ba iha periode 2017 – 2021. Iha ninia esplikasaun, jerente ne’e mos esplika katak projetu ne’e sei  apoio mos Ministériu Edukasaun hodi halo efikámente ba iha implementasaun polítika zero toleránsia nomos polítika fila hikas ba eskola.

Sinta da Cruz nu’udar partisipante kontente la halimar bele partisipa iha formasaun virtual kona-ba ligasaun ho respeita. Maske iha tópiku balun antes ne’e nia aprende ona maibe nia saliente katak iha  maneira balun ba nia foun, hanesan maneira atu hakbesik an ba labarik sira.

“Treinamentu ida ne’e hau sente kapas los tanba uza metudu partisipatorio, ne’ebe ami kontente los”, Sinta da Cruz haktuir bainhira partisipa formasaun.

Iha edifísiu Alola, jerente Alola ba programa advokasia, Maria Evelina mos tau ninia esperansa katak bainhira projeitu ida ne’e lao susesu bele habelar fila fali ba munisípiu seluk inklui RAEOA.

“Ami sente atividade ida ne’e kapas tebes atu ita bele haree katak liu husi atividade sira ne’e neneik neneik ita bele prevene violénsia hasoru feto no labarik iha Timor-Leste,” jerente Alola ba programa Advokasia haktuir.

Tuir observasaun, formasaun kona-ba “Ligasaun Ho Respeitu ba Inan Aman” durante loron tolu lao diak, partisipante sira mos hatudu sira nia matenek hodi responde pergunta ne’ebe fasilitador husu. Maske dalaruma hetan obstaklu husi rede internet maibe partisipa sira orgulhu bele hetan kapasitasaun foun liu-liu liga ba atividade ne’ebe sira sei organiza iha fulan Agostu. Depois formasaun, Ekipa Alola sei tur hamutuk ho ekipa husi Mane Ho Visaun Foun (MHVF) nomos UN Women atu oinsá halo plano atu bele halo formasaun fila-fali ba iha munisípiu tolu liu liu ba iha inan aman sira.