ALOLA NO GASC HAFORSA KOÑESIMENTU ESTUDANTE NO FOIN-SA’E 50 RESIN KONA-BA NUTRISAUN, AI-HAN LOKÁL NO SAÚDE BA FUTURU

(Alola Media/Dili) — Fundasaun Alola, liuhusi Programa Igualdade Jéneru no Direitu Feto nian, kontinua hatudu ninia kompromisu hodi haforsa foin-sa’e no estudante sira nu’udar jerasaun futuru Timor-Leste nian. Iha kinta-feira ne’e (30/04), Alola liuhusi Sentru Rekursu ba Feto (SRF) organiza tan atividade regulár ‘Diskusaun Mensál’ ne’ebé foka liu ba tòpiku “Importánsia Nutrisaun no Konsumu Ai-han Lokál”. Atividade ne’ebé hetan apoiu finanseiru husi Gabinete Apoiu Sosiedade Sivíl (GASC) ne’e, realiza iha salaun SRF, Taibessi.

Gestora Programa Igualdade Jéneru no Advokasia ba Direitu Feto nian, Sra. Maria Evelina, bainhira hala’o abertura ba sorumutu ne’e, esplika katak objetivu husi atividade ne’e mak atu hasa’e koñesimentu kona-ba importánsia nutrisaun ba foin-sa’e sira.

“Ita hatene katak labarik sira nu’udar futuru nasaun nian. Tan ne’e, ohin ami hamutuk ho Movimentu ba Nutrisaun ne’ebé foin-sa’e sira mak lidera. Sira-nia baze edukasaun mai husi área nutrisaun nian, tan ne’e ami koko kolabora ho sira atu bele partilla informasaun ba joventude sira seluk hodi nune’e sira mós bele iha koñesimentu ne’ebé di’ak,” dehan Sra. Maria Evelina.

Iha fatin hanesan, Gestora ne’e mós hato’o agradesementu ba estudante no profesór sira husi Eskola Sekundária Amigos de Jesus no Eskola Sekundária 5 de Maio, inklui estudante sira husi UNTL, UNPAZ, UNITAL, no Rotaract Club Dili.

Iha biban ne’e, Alola kolabora ho grupu foin-sa’e espesialista husi Movimentu Jerasaun Nutrisaun hodi fahe koñesimentu tékniku kona-ba nutrisaun no ai-han lokál. Sra. Marcia da Costa, ne’ebé fasilita sesaun ne’e, subliña katak Timor-Leste hanesan nasaun ida ne’ebé hasoru problema malnutrisaun aas tebes, ho porsentu ne’ebé boot iha nível Aziátiku no okupa terseiru lugár iha nível mundiál.

“Sesaun ida-ne’e importante tebes atu eduka ita-nia joven sira kona-ba oinsá importánsia nutrisaun bele kontribui ba kresimentu no dezenvolvimentu,” nia esplika.

Membru husi Movimentu Jerasaun Nutrisaun ne’e mós konsidera katak edukasaun nutrisaun ba foin-sa’e sira mak “investimentu furak” ida, tanba sira mak sei sai inan-aman iha futuru. Ho nutrisaun di’ak, foin-sa’e sira sei iha kbiit fíziku no mentál ne’ebé forte hodi aprende iha eskola no kontribui ba dezenvolvimentu rai-laran.

Husi parte edukasaun, Profesór Basiliano D.S. Barreto husi ESG 5 de Maio, husu ba estudante sira atu rekoñese fali kualidade ai-han lokál ne’ebé uluk bei-ala sira konsumu nu’udar dalan atu asegura saúde iha futuru, nune’e bele moris naruk no serbi ba rain Timor-Leste.

“Dala barak ita-nia bizavó no inan-aman sira uluk idade avansadu no dura tanba sira konsumu de’it produtu lokál husi to’os. Saida de’it mak sira kuda, ida-ne’e mak sira han,” hato’o Profesór Basiliano.

Estudante sira ne’ebé partisipa hatudu interese boot. Geraldo Ribeiro Soares husi Eskola 5 de Maio no Nelsia Fatima husi Amigos de Jesus, sente haksolok tanba bele aprende oinsá hasees an husi moras liuhusi mudansa hahalok moris nian.

“Nu’udar joven, ami presiza duni aprende ida-ne’e tanba joven sira presiza han ai-han lokál hodi prevene moras no hametin saúde,” tenik Nelsia Fatima.

Alende ne’e, Sra. Sandrina Babo, estudante husi UNTL, hateten katak hili ai-han lokál la’ós de’it di’ak ba saúde, maibé mós ba dezenvolvimentu ekonomia rai-laran. “Bainhira ita hili ai-han lokál, ita ajuda mós ita-nia agrikultór sira no automatikamente hadi’a ekonomia Timor-Leste nian.”

Profesór sira ne’ebé akompaña mós fó sasin katak formasaun hanesan ne’e ajuda tebes estrutura eskola nian, liuliu iha implementasaun programa Merenda Eskolár no jestaun kantina, hodi asegura katak estudante sira konsumu ai-han ne’ebé fó duni enerjia no matenek.

Iha remata, Sra. Maria Evelina fó hanoin ba foin-sa’e sira katak Sentru Rekursu ba Feto (SRF) nakloke ba públiku no gratuita ba sira ne’ebé hakarak uza komputadór, asesu internét ba kbiit akadémiku, no lee livru iha biblioteka. Sentru ne’e mós sai fatin ba formasaun lideransa, saúde reprodutiva, no protesaun ba direitu feto nian.

“Ami-nia esperansa mak foin-sa’e na’in 50 resin ne’ebé partisipa ohin bele hato’o fila fali informasaun ne’e ba sira-nia família, hodi hahú konsumu ai-han lokál hodi redús malnutrisaun iha Timor-Leste,” ramata Sra. Maria Evelina.

Liuhusi atividade ne’e, Fundasaun Alola no GASC hametin fundasaun hodi asegura katak foin-sa’e sira iha kapasidade no koñesimentu hodi lori Timor-Leste ba oin.

#FundasaunAlola #GASC #NutrisaunTimorLeste #AiHanLokal #WRC #JoventudeMatenek #IgualdadeJeneru