REPREZENTANTE BMETS – BMTT ENTREGA OFISIALMENTE LAPTOP 4 BA BENEFISIÁRIA PROGRAMA BOLSU ESTUDU ALOLA

(Alola Media-Dili) Horisehik, (23 Abríl 2026), iha Edifísiu provizóriu Fundasaun Alola – CBD 10 Timor Plaza, grupu ida husi estudante benefisiáriu programa Bolsu Estudu Alola hala’o enkontru ho reprezentante doador Blue Mountains Timor-Leste Sisters (BMETS) no Blue Mountains Together for Timor (BMTT). Enkontru ne’e rasik partisipa husi estudante alvu 10 husi munisípiu Bobonaro, Aileu, Atauro, no maioria husi Hatubuilico – Ainaro ne’ebé iha tinan ne’e simu bolsu estudu atu bele kontinua sira nia estudu iha universidade balun hanesan UNTL, UNPAZ, IOB no seluk tan.

Akompanha husi Jerente Fundasaun Alola ba Programa Edukasaun, Sra. Nuni Nobre, reprezentante BMETS no BMTT, Sra. Jude Finch haksolok tebes tanba bele hasoru direta ho estudante bolseira sira hodi hatene dezenvolvimentu edukasaun ne’ebé sira hala’o, susar ne’ebé sira hasoru, no nesesidade seluk tan sira presiza. Iha oportunidade hanesan, reprezentante BMETS no BMTT ne’e mós entrega ofisialmente laptop 4 ba estudante alvu programa nian.

Nudar organizasaun Austrália ida ne’ebé durante ne’e fó apoiu ba Timor-Leste, liuliu iha área feto nian iha tempu naruk, BMETS no BMTT halibur ona fundus liu dolár millaun ida hodi dezenvolve feto Timor nia moris iha área oin-oin hanesan advokasia, saúde, ekonomia, desportu, edukasaun inklui apoiu advokasia direitu feto nian. BMETS no BMTT mós harii eskola no fó bolsa estudu ba estudante feto atus ba atus ne’ebé hakarak kontinua ba nivel sekundáriu no universidade.

“Programa Bolsu Estudu ne’e Ita komesa de’it ho estudante na’in 5 ka 10, maibé tinan ba tinan, programa ne’e dezenvolve no aumenta boot ba beibeik. Agora, iha tinan ne’e, iha ona estudante na’in 39 iha ita-nia programa. Ne’e barak tebes,” dehan Jude Finch, reprezentante BMETS no BMTT.

Ho vizaun no mehi atu bele ajuda feto Timor-Leste dezenvolve sira-nia moris, BMETS no BMTT kolabora ho Fundasaun Alola iha programa bolsu estudu ba estudante sira. Entrega laptop ne’ebé hala’o horisehik sai hanesan parte importante husi programa ne’e hodi apoia atividade aprendizajen ne’ebé hala’o husi estudante benefisiáriu sira.

“Bondia, Elvira. Ha’u-nia naran Jude, ha’u reprezentante husi Blue Mountains. Ita boot simu laptop ne’e ohin nudar parte husi programa bolsu estudu husi Blue Mountains. Parabéns. Boa sorte ba o-nia estudu,” Sra. Jude Finch haktuir molok entrega laptop ba Elvira, ida husi benefisiáriu sira.

Bolseira Elvira Teresinha da Silva, estudante UNPAZ ne’ebé durante ne’e hetan apoiu husi BMETS, sente kontente tebes tanba bele simu direta laptop foun ida husi Sra. Jude Finch. Nia mós promete sei uza fasilidade ne’ebé fó ona ne’e ho di’ak to’o nia remata estudu.

“Obrigada ba mana Jude, nune’e mós ba Fundasaun Alola, ne’ebé fó ona kbiit ba ha’u hodi bele uza ba ha’u-nia estudu to’o remata,” esplika estudante semestre 1 UNPAZ ne’e.

Agradezimentu mós hato’o husi Ceremius Araujo, estudante ida ne’ebé hetan oportunidade kontinua edukasaun iha fakuldade Komérsiu no Turizmu iha UNTL.

“Ha’u hakarak hato’o de’it obrigada barak ba Blue Mountains. Ha’u sente foti-an ba ha’u-nia an rasik tanba bele halo buat ne’ebé uluk ha’u hanoin labele, ho ajuda husi Blue Mountains. Iha ne’e, ha’u laiha buat ida atu fó, maibé ha’u hato’o de’it obrigada ba oportunidade ne’ebé ha’u foin simu ne’e,” nia haktuir.

La hanesan prosesu estudu iha eskola sekundáriu, prosesu aprendizajen iha nivel universidade presiza meius barak inklui ekipamentu teknolojia sira hodi bele fasilita asesu ba liña internet no hala’o servisu uma (TPC). Iha situasaun ida-ne’e, laptop sai ekipamentu importante ida ba sira atu fasilita no tulun sira responde ba prosesu estudu nian. Ida-ne’e mós sai razaun doador sira fó laptop ba estudante sira. Kestaun ne’e mós reforsa husi Ofisiál Projétu ba programa Bolsu Estudu Alola, Sr. Triponio Verdial.

“Laptop hamutuk 4 ne’ebé entrega husi Mana Jude hanesan apoiu ba prosesu aprendizajen ba estudante alvu programa bolseiru Alola ne’ebé durante ne’e hetan apoiu doador husi BMETS no BMTT – Austrália,” dehan Triponio.

Tuir dadus, hahú husi 2023-2026, BMETS no BMTT-Austrália fornese ona apoiu laptop hamutuk 31 ba estudante alvu sira.

Programa Bolsu Estudu Fundasaun Alola suporta estudante vulnerável husi nivel Ensinu Báziku to’o Universidade iha Timor laran tomak. Iha tinan ne’e, projétu bolsu estudu kontinua administra no fornese suporta ba estudante sira hodi asesu ba edukasaun iha nível Ensinu Báziku, Ensinu Sekundáriu, Universidade no mós Eskola Tékniku Vokasionál. Projétu bolsu estudu ne’e rasik hetan suporta anuál husi doador hamutuk 17 inklui ajénsia, kompañia, komité, no doador individuál sira. Ba tinan 2025, projétu ne’e fasilita ona bolsu estudu ba estudante hamutuk 257 iha nivel Ensinu Báziku to’o Universidade.

MAI ITA HATENE KONA-BA BMETS NO BMTT

BMETS hanesan organizasaun ida husi Austrália ne’ebé fó apoiu ba Timor-Leste hahú husi tinan 2004. Ho inisiativa ida hodi ajuda dezenvolve Timor-Leste, liuliu iha área feto nian, BMETS halibur apoiu husi grupu komunidade hamutuk 60 resin iha área Blue Mountain – Sydney no área seluk iha Austrália hodi fó apoiu oin-oin inklui apoiu finanseiru atu ajuda resolve problema barak relasiona ho moris feto nian iha Timor-Leste. Durante tinan 15, BMETS halibur ona fundus liura dolár millaun ida hodi dezenvolve feto Timor nia moris iha área oin-oin hanesan advokasia, saúde, ekonomia, desportu, no edukasaun.

Blue Mountains Together for Timor (BMT4T), nudar organizasaun karidade ida ne’ebé estabelese iha tinan 2015 iha Blue Mountain, New South Wales – Austrália, no kompostu husi reprezentasaun husi Blue Mountains East Timor Sisters, Blue Mountains City Council Hatobuilico Friendship no Grupu Suporta Timor Lorosa’e. Ezisténsia BMT4T durante tinan 7 resin hametin ona relasaun komunikasaun entre komunidade lokál iha área Hatobuilico – Ainaro ho komunidade iha Blue Mountains – Austrália. Durante tinan naruk ida-ne’e, BMT4T dedika sira-nia serbisu atu tulun dezenvolve rekursu sira, liuliu iha edukasaun no lideransa feto nian.

#remata #timorleste #australia #bolsuestudu