"SEI ITA LA KAER METIN, IKUS FALI MAI, ITA LA HATENE ITA NIA KLAMAR, ITA NIA ABUT, ITA NIA HUN, ITA IDA-IDA LA HATENE MAI HUSI NE’EBE".

Lia-menon husi Prezidente ba Komisaun Organizadora Selebrasaun loron Konsulta Popular 30 de Agostu ba dala ruanulu (20) Kay Rala Xanana Gusmão bainhira ensera eventu Tinan Internasional ba Lian Indijenas iha Timor-Leste

“Maluk sira ne’ebe hau respeita tomak, los duni hau kontente tanba hau haree iha ne’e reitor ida husi universidade ida, hau husu boot imi hanoin tok ba sei bele loke antropolojia iha ne’eba para ita bele buka atu konese ita nia an rasik, lae susar. Sei ita la kria vontade husi nova jerasaun , ita whatapp deit, facebook deit, ita pinta ibun deit, ita lakon tia kedas.

Ita haree ba kotuk ita la iha klamar, ita nia isin lolon mak Timor-oan mas ita nia klamar la iha, tanba ida ne’e hau husu ita boot sira iha Universidade karik iha ema ruma ho vontade atu ba area ida ne’e, haruka ba, ba aprende uitoan mai fali, tanba katuas sira ne’e, sorte sira seluk mos kaer dadauk ona, ita uluk katuas sira la hatene hakerek tanba ida ne’e ita dehan ita nia istória,  istória oral husi avo mai oan, husi oan mai oan tan mak kaer  tuir ne’e.  Ita nia istória sira riku teb-tebes tanba lian inan deit liu 30, iha Tuatuala ne’eba lakon tiona mas iha katuas balun sei koalia, ida rua sei koalia. Ohin loron ho tehnolojia ne’ebe iha ba grava sira nia koalia. Hanesan ohin, mai koalia iha nee ita la komprende buat ida los, ita atu ba hakerek tuir susar mas ita tenke buka aproveita tehnolojia ohin loron ne’e, ita grava tia depois ita hakerek, ida ne’e los kalae, los ka lae, sei lae susar.

Ohin kuandu sira lei sira nia puizia “Mar Meu” ne’e, ida hau hakotuk ona ho Australia, Hau hakotuk tan ho Indonesia, hau serbisu hotu ona, hau atu buka lao haleu Timor ba grava katuas sira koalia, sira konta, sira hananu, sei lae ita lakon hotu, ita nia klamar la iha tia deit.

Ita laos selebra deit tinan lian indijenas maibe ita atu relembra mai ita, atu dehan deit katak la kleur ita la hatene ita ne’e se los. Tanba saida hau koalia hanesan ne’e, tanba labarik sira barak agora, 75 porsentu husi populasaun Timor nian 1 Millaun dozentus I tal mill, ne’e katak liu husi 50 porsentu, 75 porsentu iha 25 anos nia okos. Katak liu sorin balun foinsae hotu.

Ho dezenvolve ita nia sosiedade mai hotu sidade mai buka matenek, mai buka serbisu, mai hotu tia, sente sira nia abut ne’e hau mai husi Manatuto mas koalia tok Laletai, hau la hatene ida. Ho dezenvolvimentu sosiedade hanesan ne’e sei ita la kaer metin, ikus fali mai, ita la hatene ita nia klamar, ita nia abut, ita nia hun, ita ida-ida la hatene mai husi ne’ebe.

Foin dadaun iha dia 30, hatudu dadaun ona, ita nia abut mai husi pedasuk-pedasuk sira  ne’eba hotu, ida ne’e mak  ita tenke orgulhu ba ida ne’e. Hau admira Indonesia tanba boot teb-tebes, kultura keta-ketak, kultura barak teb-tebes  liu ita, ita rai liil oan, ita nia kultura diferente barak ona, sira barak liu, mas sira konsege preserva, ita ba Bali, sira nia kultura oin ida, ita ba Jawam Jawa Timur oin ida, Jawa ida ne’e ida Jawa ida ne’eba oin ida, ita ba Sulawesi oin ida, ita ba Sumatra oin ida. Sira konsege preserva tanba ida ne’e sira dehan Bhineka Tunggal Ika. Portuguese ema dehan Unidade na Diversidade, Unidade, ita nu’udar povo Timor unidu teb-tebes, na Diversidade, sira ba koalia lian ida, maneira oin ida, hananu oin ida.

Primeiraves hau tama Timor nia klamar lolos, depois invasaun, husi Maubisse ami fahe malu iha ne’eba, hau ba Turisai, sai foho Fatuk Makerek ba Laklubar, bolu dehan Foho Hitu. To’o Foho Fatu Makerek ne’eba familia, katuas tolu ka haat, ferik kala haat ka lima, oan mane uitoan, oan feto, kalan sira nono hela lehe, ami han ho anin malirin tan, ho suar sira hotu, sira kanta, ferik katuas sira kanta ho sira nia lian, mane kloasan no feto klosan sira kanta tuir, ami nia hanoin ami iha lalehan, ami la komprende buat ida, buat ida halo ita sente wow, lakon hotu ona, lakon hotu ona, pelumenus sei ita halo estudu ida, rekolha buat sira ne’e hotu no ita tau iha fatin ida para ita nia be oan – be oan sira dehan oooh  ita nia hun mak ne’e, ita nia abut mak iha ne’eba.

Hau dehan katak, hau nia serbisu hotu ona, tanba sira relembra fila-fali “Mar Meu” soring, falta sorin, sorin ne’e hau hakarak sai buat ruma hamnasa hanesan labarik sira, hotu tia hau sei buka ba haforsa an ba fatin hotu-hotu ba rona, grava, koalia, konta istória, konta-konta-konta to’o iha ne’ebe deit, sei lae ita lakon ita nia klamar, sei lae ita lakon labarik sira ikus fali mai la hatene sira nia hun mai husi ne’ebe, hun hanusa, abut hanusa. Hun maka bua nia hun ka? Tali nia hun ka? Buat sira ne’e hotu. Ne’ebe hau louva teb-tebes inisiativa ida ne’e mas ita kontinua nafatin, ita tenke buka, loke liu-liu jovens universidade sira, hau hakarak hateten urgente uitoan para ita haka’as an hodi ba kaer metin ita nia abut, ita nia hun no ita nia kultura. Mak ne’e deit, obrigado barak”

Rona lia-menon husi Kay Rala Xanana Gusmão iha enseramentu eventu Tinan Internasional ba Lian Indijenas iha Timor-Leste
"Hau sei buka ba haforsa an ba fatin hotu-hotu ba rona, grava, koalia, konta istória, konta-konta-konta to’o iha ne’ebe deit, sei lae ita lakon ita nia klamar, sei lae ita lakon labarik sira ikus fali mai la hatene sira nia hun mai husi ne’ebe, hun hanusa, abut hanusa. Hun maka bua nia hun ka? Tali nia hun ka?"
Kayrala Xanana Gusmao
%d