DIRETÓR-EZEKUTIVU UNMICS : “ITA TENKI VALORIZA NO APRESIA BA ESFORSU NE'EBÉ MAKA DURANTE NE'E REDE IDA NE'E HALO”

(Alolamedia/Dili) Iha loron 29 fulan Maio 2026, Rede Sosiedade Sivíl Hadiak Nutrisaun Timor-Leste (RSSHN-TL / Scaling Up Nutrition Movement Timor-Leste) ne’ebé transforma ba Aliansa Sosiedade Sivil ba nutrisaun (ASSN) realiza enkontru trimestrál ho membru organizasaun sira. Kordenadora ASSN, Diretora-Ezekutiva Fundasaun Alola, Sra. Maria Guterres informa katak reuniaun ne’ebe realiza iha Salaun Sentru Rekursu ba Feto Alola – Taibesi fo opurtunidade kada membru sira atu bele update fila fali sira progressu atividade ne’ebé implementa.  

“ojetivu ita nia enkontru ohin mak atu update fila fali progresso atividade inklui atividade saida mak sei planu atu realiza iha tinan ida ne’e”, esplika Kordenadora ASSN.

Loke ofisialmente husi Diretór-Ezekutivu FONGTIL, Sr. Inocencio de Jesus Xavier  akompanha husi Pontu-Fokál SUN Timor-Leste, Sr. Joel Maria Pereira no mós Diretora Fundasaun Alola, Maria Guterres, enkontru trimestral ASSN ba fulan Maio diskuti klean kona-ba plano implementasaun atividade ne’ebe hetan apoio husi Gabinete de Apoio a Sosiedade Civil (GASC).

“Sekretariadu hato’o mós ba rede ida-ne’e, aliansa ida-ne’e, tanba ita hatene importánsia  saúde, saúde ne’e la’ós de’it ho programa maibé ne’e liuhusi lei, liuhusi konstituisaun, entaun, ne’e obrigasaun ba parte governu nian mós obrigasaun estadu oinsá governu halo sosa buat sira-ne’e hodi lori ba melloramentu saúde públika.”, hato’o Diretór-Ezekutivu FONGTIL, Sr. Inocencio de Jesus Xavier antes halo abertura.

Diretór-Ezekutivu FONGTIL mos espera katak liuhosi enkontru ida-ne’e bele hetan rezultadu ka planu ruma ne’ebé di’ak hodi nune’e bele aprezenta ba parseiru finanseiru sira atu nune’e bele kontinua hetan fundus hodi sustenta atividade ASSN sira iha futuru.

Entertantu, Diretór-Ezekutivu Unidade dé Missão para o Combat ao Stunting (UNMICS) no mós Pontu-Fokál SUN Timor-Leste, Sr. Joel Maria Pereira apresia tebes ho envolvimentu ne’ebe Aliansa Sosiedade Sivil ba nutrisaun (ASSN) liu husi atividade oi-oin halo tantu iha nivel nasional no rejional.

“Ida ne’e sinal pozitivu ida ne’ebé maka ita tenki apresia, laos de’it hanesan Pontu Fokal Nasional SUN Timor-Leste, mai be mos hanesan diretór ezekutivu UNMICS reprezenta governu, ita tenki valoriza no apresia ba esforsu ne’ebé maka durante ne’e rede ida ne’e halo”, apresiaun ida husi  Diretór-Ezekutivu Unidade dé Missão para o Combat ao Stunting (UNMICS) no mós Pontu-Fokál SUN Timor-Leste, Sr. Joel Maria Pereira.

Papél sosiedade sivíl hanesan parseiru governu nian importante atu bele transforma moris labarik sira, joven no família sira ba kondisaun ne’ebé dignu. Maski hasoru limitasaun oin-oin kona-ba fundus kona-ba ekipamentus serbisu, lojístiku no rekursu umanus, membru sosiedade sivíl ho sira nia vontade hanesan Timor oan kontinua nafatin fó sira nia kontribuisaun atu kombate problema malnutrisaun.

Reuniaun ASSN ne’ebé hetan partisipasaun husi ekipa UNMICS, Ponto Vocal SUN Nacional TL, Diretor FONGTIL, Diretora Alola  nomos direitor/a ho reprezentante husi sosiedade  sivil membru sira sai hanesan reuniaun regulár kada fulan tolu ne’ebé realiza hodi bele disemina informasaun no progresu ne’ebé iha inklui mós kona-ba atividade rejionál ne’ebé membru sira partisipa no mapeamentu atividade nutrisaun.

Aliansa Sosiedade Sivil ba Nutrisaun (ASSN) nu’udar organizasaun ida ne’ebé tau matan ba asuntu nutrisaun ne’ebé estabelese iha loron 16 fulan Maio 2023 husi organizasaun sanulu mak hanesan Fundasaun Alola, Plataforma Nasional Bee Saneamentu no Ijiene Timor leste (BESI TL) Parseira Sosiedade Sivíl ba Edukasaun (CSEP), FONGTIL , JL, Plan, TLCE, FHTL, FFHT, MAHON Governo liu husi UNMICS ne’ebé sai mós pontu vogál ba ba SUN Timor-Leste iha fulan abríl 2020 iha Dili. Ho vizaun Timoroan sira bele hetan nutrisaun di’ak, saudavel no livre husi kualkér tipu malnutrisaun, ezisténsia ASSN sei reforsa programa intervensaun no prevensaun problema nutrisaun ho nune’e bele hamenus ra’es badak (stunting) iha Timor-Leste liu husi atividade peskiza, advokasia, edukasaun, disemina informasaun no fó akonsellamentu ba komunidade sira iha Timor-Leste.

Enkontru Trimestral ASSN ne’e hetan apoio husi Gabinete de Apoio a Sosiedade Civil (GASC).

Photo ALOLA Media